اسلام آباد(قدرت روزنامہ)اسلام آباد پولیس کے اہلکاروں نے غریب محنت کش مزدور سے دورانِ تلاشی مبینہ طور پر 30 ہزار روپے نکال لیے جس کے بعد متاثرہ محنت کش شہری نے انصاف کے لیے تھانہ شہزاد ٹاؤن میں درخواست دے دی ہے۔
تفصیلات کے مطابق تھانہ شہزاد ٹاؤن کی حدود میں پیش آنے والے واقعے میں محمد اسماعیل ولد میر ولی شاہ نامی محنت کش، جو روزگار کی تلاش میں ترامڑی چوک پر موجود تھا اس وقت واردات کا شکار ہو گیا جب سفید رنگ کی کلٹس کار میں سوار دو مسلح افراد اس کے پاس آئے۔ متاثرہ شہری کے مطابق دونوں افراد پولیس کی وردی میں ملبوس تھے اور خود کو اہلکار ظاہر کرتے ہوئے اسے تلاشی کے بہانے گاڑی میں بٹھا لیا۔
محمد اسماعیل کا کہنا ہے کہ ملزمان اسے گاڑی میں بٹھا کر چک شہزاد کی طرف لے گئے اور راستے میں تلاشی لینے کے دوران بڑی مہارت سے اس کے پرس سے 30 ہزار روپے نکال لیے بعد ازاں ملزمان نے خالی پرس ایک شاپر میں ڈال کر گرہ لگا کر اس کے حوالے کر دیا تاکہ اسے فوری طور پر اندازہ نہ ہو سکے۔
متاثرہ شخص کے مطابق ملزمان اسے قبرستان والے ٹھیہ رحیموں چوک کے قریب اتار کر موقع سے فرار ہو گئے۔ جب اس نے شاپر کھول کر دیکھا تو پرس خالی تھا اور اس کی جمع پونجی غائب تھی۔
محمد اسماعیل کا کہنا ہے کہ یہ رقم اس نے بڑی محنت اور بچت سے جمع کی تھی تاکہ اپنے گھر والوں کی ضروریات پوری کر سکے۔ رقم چھن جانے پر وہ شدید صدمے سے دوچار ہو گیا اور انصاف کے لیے تھانہ شہزاد ٹاؤن کے ایس ایچ او کو تحریری درخواست دے دی ہے۔
واقعے کے بعد شہری حلقوں میں تشویش کی لہر دوڑ گئی ہے اور مطالبہ کیا جا رہا ہے کہ پولیس فوری طور پر واقعے کی تحقیقات کر کے ملوث افراد کو قانون کے کٹہرے میں لائے تاکہ شہریوں کے اعتماد کو بحال کیا جا سکے۔
