اسلام آباد (نیوز ڈیسک) رمضان المبارک کے آغاز کے ساتھ ہی گوشت کی قیمتوں میں غیر معمولی اضافہ دیکھنے میں آیا ہے جس نے شہریوں کو پریشان کر دیا ہے۔
اطلاعات کے مطابق رمضان شروع ہوتے ہی فی کلو گوشت کی قیمت میں معمولی نہیں بلکہ تقریباً ڈیڑھ سو سے دو سو روپے تک اضافہ ریکارڈ کیا گیا ہے۔ بکرے کا گوشت جو چند روز پہلے تقریباً 2200 روپے فی کلو دستیاب تھا، اب 2400 سے 2500 روپے تک فروخت ہو رہا ہے، جبکہ گائے یا بیف کی قیمت بھی ساڑھے تیرہ سو سے بڑھ کر تقریباً 1500 روپے فی کلو تک پہنچ گئی ہے۔مہنگائی کے باعث یہ نرخ عام صارفین کی استطاعت سے باہر ہوتے جا رہے ہیں۔ ضلعی انتظامیہ نے سرکاری نرخ نامہ جاری کرتے ہوئے بکرے کے گوشت کی قیمت 2000 روپے فی کلو، ہڈی والے بڑے گوشت کی 1050 روپے اور بغیر ہڈی گوشت کی 1200 روپے فی کلو مقرر کر رکھی ہے۔
دکانداروں کا مؤقف ہے کہ سرکاری نرخوں پر فروخت کرنے سے انہیں نقصان اٹھانا پڑتا ہے، جبکہ شہریوں کا کہنا ہے کہ حکام کو صرف اعلانات تک محدود رہنے کے بجائے عملی اقدامات کرنے چاہئیں تاکہ ناجائز منافع خوری روکی جا سکے۔
عوام کا شکوہ ہے کہ حکومتی دعوؤں کے باوجود بازاروں میں مقررہ نرخوں پر عملدرآمد نظر نہیں آ رہا اور خریدار بدستور مہنگائی کے دباؤ کا سامنا کر رہے ہیں۔
