اسلام آباد میں سپریم کورٹ نے قومی ایئرلائن پاکستان انٹرنیشنل ایئرلائنز (پی آئی اے) کو اپنے ایک سابق ملازم کو 24 سال کی بقایا پنشن ادا کرنے کا حکم دے دیا جبکہ ایم ڈی پی آئی اے کو بھی ذاتی حیثیت میں طلب کر لیا گیا ہے۔
درخواست گزار کے وکیل نے عدالت کو بتایا کہ ان کے موکل کو 2002 میں ایک اسکیم کے تحت ریٹائر کیا گیا تھا اور سندھ ہائی کورٹ کے حکم پر پنشن سمیت دیگر مراعات فراہم کی جا چکی ہیں تاہم گزشتہ 24 سال کے بقایاجات تاحال ادا نہیں کیے گئے۔
سماعت کے دوران جسٹس شاہد وحید نے ریمارکس دیے کہ کیا کسی ملازم کو پنشن ادا نہ کرنے کا کوئی قانون موجود ہے؟ جس پر وکیل نے مؤقف اختیار کیا کہ دیگر تمام ملازمین کو پنشن دی جا رہی ہے۔
لاہورمیں ٹریفک جرمانوں میں بڑی کمی، شہریوں کیلئے ریلیف کا امکان
پی آئی اے کے وکیل نے مؤقف اختیار کیا کہ اس حوالے سے ادارے سے ہدایات لینا ہوں گی۔ عدالت نے سخت برہمی کا اظہار کرتے ہوئے ہدایت کی کہ آئندہ سماعت سے قبل اگر پنشن ادا نہ کی گئی تو ایم ڈی پی آئی اے کو خود پیش ہونا ہوگا۔
عدالت نے کیس کی مزید سماعت 23 اپریل تک ملتوی کر دی۔
