راولپنڈی: پاکستان تحریک انصاف (پی ٹی آئی) کے چیئرمین بیرسٹر گوہر نے پارٹی کے بانی عمران خان سے ملاقات کی اجازت ملنے کے باوجود ملاقات کرنے سے انکار کر دیا اور جیل سے واپس روانہ ہو گئے۔
ذرائع کے مطابق جیل انتظامیہ نے بیرسٹر گوہر کو ملاقات کی اجازت دی تھی، تاہم انہوں نے اکیلے ملاقات کرنے سے انکار کر دیا اور درخواست کی کہ ملاقات میں عمران خان کے ساتھ ایک فیملی ممبر یا وکیل بھی موجود ہوں۔
اطلاعات کے مطابق بیرسٹر گوہر کو جیل کے داخلی دروازے تک آنے کی اجازت دی گئی، لیکن اس کے بعد وہ واپس چلے گئے۔
میڈیا سے گفتگو کرتے ہوئے بیرسٹر گوہر نے کہا کہ عمران خان کے احکامات کے مطابق محمود خان اچکزئی اور علامہ راجا ناصر فیصلہ کریں گے کہ مذاکرات کب اور کس کے ساتھ کیے جائیں۔
انہوں نے مزید کہا کہ انہیں میڈیا کے ذریعے یہ معلوم ہوا کہ عمران خان کی آنکھ میں انفیکشن ہے، اور اگر یہ درست ہے تو یہ تشویش کی بات ہے۔ بیرسٹر گوہر نے واضح کیا کہ فیملی ملاقاتوں پر سیاست کا اثر نہیں ہونا چاہیے۔
مزید تفصیلات کے لیے وزٹ کریں: www.b42news.tv
