وزیراعظم شہباز شریف نے ایران کے نئے سپریم لیڈر مجتبیٰ خامنہ ای کے نام خط ارسال کرتے ہوئے آیت اللہ سید علی خامنہ ای کی شہادت پر گہرے رنج و غم اور تعزیت کا اظہار کیا ہے۔
وزیراعظم نے اپنے پیغام میں ایرانی قیادت، عوام اور امت مسلمہ سے دلی ہمدردی کا اظہار کرتے ہوئے کہا کہ پاکستانی عوام اس سانحے پر شدید دکھ اور غم میں مبتلا ہیں۔
وزیراعظم نے مجتبیٰ خامنہ ای کو ایران کے سپریم لیڈر کی ذمہ داریاں سنبھالنے پر مبارکباد بھی دی اور ان کیلئے نیک تمناؤں کا اظہار کیا۔
جنگ کے خاتمے کا فیصلہ ہم کریں گے، ایرانی پاسداران انقلاب کا اعلان
انہوں نے کہا کہ اس مشکل وقت میں پاکستان ایران کی قیادت اور عوام کے ساتھ مکمل یکجہتی کے ساتھ کھڑا ہے اور دونوں برادر ممالک کے درمیان مضبوط تعلقات مزید مستحکم ہوتے رہیں گے۔
خط میں وزیراعظم نے کہا کہ پاکستان اور ایران کے تعلقات مشترکہ عقیدے، تاریخ، ثقافت اور زبان پر مبنی ہیں اور دونوں ممالک کے درمیان باہمی احترام اور تعاون کی طویل روایت موجود ہے۔
انہوں نے امید ظاہر کی کہ مجتبیٰ خامنہ ای کی قیادت ایران کو امن، استحکام، وقار اور خوشحالی کی جانب مزید آگے بڑھائے گی۔
وزیراعظم شہباز شریف نے اس عزم کا بھی اعادہ کیا کہ پاکستان ایران کے ساتھ مل کر کام جاری رکھے گا اور باہمی دلچسپی کے مختلف شعبوں میں دوطرفہ تعاون کو مزید فروغ دیا جائے گا۔
انہوں نے آخر میں مجتبیٰ خامنہ ای کی کامیابی اور ایران کے برادر عوام کیلئے امن، ترقی اور خوشحالی کی دعا بھی کی۔
