پاکستان کا بنگلا دیش کی حمایت کا اعلان

ٹی ٹوئنٹی ورلڈ کپ سے متعلق قومی ٹیم کی تمام تیاریاں روک دی گئیں

اسلام آباد: (بی 42 نیوز)
پاکستان نے ٹی ٹوئنٹی ورلڈ کپ کے معاملے پر بنگلا دیش کی بھرپور حمایت کا اعلان کرتے ہوئے قومی ٹیم سے متعلق تمام تیاریاں عارضی طور پر روک دی ہیں۔ ذرائع کے مطابق یہ فیصلہ خطے میں سکیورٹی صورتحال اور بنگلا دیش کے تحفظات کے پیش نظر کیا گیا ہے۔

ذرائع کا کہنا ہے کہ پاکستان کرکٹ بورڈ کے چیئرمین محسن نقوی نے واضح ہدایات جاری کی ہیں کہ ٹی ٹوئنٹی ورلڈ کپ کے لیے پاکستان ٹیم کی تیاریوں کو فی الحال روک دیا جائے۔ ٹیم مینجمنٹ کو آئندہ کے لائحہ عمل سے متعلق بعد میں آگاہ کیا جائے گا۔

ذرائع کے مطابق پی سی بی نے ٹیم مینجمنٹ سے یہ بھی کہا ہے کہ اگر پاکستان ورلڈ کپ میں شرکت نہ کرنے کا فیصلہ کرتا ہے تو اس صورت میں ایک متوازی منصوبہ (Alternative Plan) بھی تیار کیا جائے، تاکہ کسی بھی ممکنہ صورتحال سے نمٹا جا سکے۔

ادھر پاکستان نے بنگلا دیش کے اس فیصلے کی مکمل حمایت کی ہے جس کے تحت بنگلا دیش نے ٹی ٹوئنٹی ورلڈ کپ کھیلنے کے لیے بھارت نہ جانے کا عندیہ دیا ہے۔ پاکستان نے بنگلا دیش کے سکیورٹی تحفظات کو معقول، جائز اور قابلِ فہم قرار دیا ہے۔

ذرائع کے مطابق ٹی ٹوئنٹی ورلڈ کپ کے معاملے پر بنگلا دیش نے پاکستان سے باضابطہ رابطہ بھی کر لیا ہے اور دونوں ممالک کے درمیان مسلسل مشاورت جاری ہے۔ پاکستان نے واضح مؤقف اختیار کیا ہے کہ اگر بنگلا دیش کا معاملہ حل نہ ہوا تو پاکستان بھی ورلڈ کپ میں شرکت کے فیصلے پر نظرثانی کر سکتا ہے۔

کرکٹ حلقوں کے مطابق پاکستان کا یہ مؤقف نہ صرف خطے میں سکیورٹی خدشات کو اجاگر کرتا ہے بلکہ بین الاقوامی کرکٹ میں کھلاڑیوں کے تحفظ کو اولین ترجیح دینے کا پیغام بھی دیتا ہے۔

ٹی ٹوئنٹی ورلڈ کپ کے حوالے سے حتمی فیصلے کا انتظار کیا جا رہا ہے، تاہم پاکستان کرکٹ بورڈ اور حکومتی سطح پر مشاورت کا سلسلہ جاری ہے۔