لاہور: وزیراعلیٰ پنجاب کی زیر صدارت رمضان المبارک کی پیشگی تیاریوں اور عوامی ریلیف سے متعلق اہم اجلاس منعقد ہوا، جس میں صوبے بھر کے مستحق افراد کے لیے 47 ارب روپے کے رمضان نگہبان پیکج کی منظوری دی گئی۔
اجلاس میں بتایا گیا کہ 42 لاکھ مستحق خاندانوں کو فی خاندان 10 ہزار روپے کی نقد امداد فراہم کی جائے گی تاکہ رمضان المبارک کے دوران وہ اپنی بنیادی ضروریات باوقار انداز میں پوری کر سکیں۔ وزیراعلیٰ پنجاب نے ہدایت کی کہ امداد کی فراہمی کا عمل شفاف، تیز اور بلا تعطل ہونا چاہیے۔
اجلاس میں یہ فیصلہ بھی کیا گیا کہ مستحق افراد کو رمضان نگہبان کارڈ جاری کیے جائیں گے، جو ضلعی انتظامیہ کے ذریعے گھر گھر جا کر فراہم کیے جائیں گے تاکہ بزرگوں، خواتین اور معذور افراد کو کسی قسم کی دشواری نہ ہو۔
نگہبان کارڈ کے ذریعے مستحقین بینک آف پنجاب کے مقررہ دکانداروں سے اشیائے ضروریہ خرید سکیں گے۔ مزید یہ کہ یہ کارڈ بینک آف پنجاب کی اے ٹی ایم مشینوں پر بھی ایکٹیویٹ کیا جا سکے گا تاکہ نقد رقم حاصل کرنا ممکن ہو۔
وزیراعلیٰ پنجاب نے واضح کیا کہ رمضان نگہبان پیکج کا مقصد مہنگائی کے دباؤ میں عوام کو حقیقی ریلیف فراہم کرنا ہے اور اس میں کسی قسم کی کوتاہی برداشت نہیں کی جائے گی۔
