لاہور: ویب ڈیسک | January 27, 2026
لاہور میں وزیر ریلوے حنیف عباسی کی زیر صدارت اجلاس منعقد ہوا، جس میں پاکستان ریلوے کے شعبہ ٹریفک اینڈ کمرشل کی کارکردگی کا تفصیلی جائزہ لیا گیا۔
اجلاس کے دوران وزیر ریلوے نے چیف کمرشل مینجر کو ہدایت کی کہ وہ مختلف ٹرینوں میں خود سفر کر کے نظام میں موجود خامیوں کی نشاندہی کریں تاکہ فوری اصلاحات عمل میں لائی جا سکیں۔
وزیر ریلوے نے تمام ڈویژنز کے ڈی ایس کو ہدایت دی کہ نیلامیوں کو اوپن آکشن کے ذریعے شفاف طریقے سے یقینی بنایا جائے۔ اس کے علاوہ آٹو موبائل کی نقل و حمل کے لیے 50 ویگنوں پر مشتمل ماڈل پلان تیار کرنے کی بھی ہدایت دی گئی۔
اجلاس میں ٹرینوں میں لگے لگیج اور بریک وینز کی کمی کو پورا کرنے پر زور دیا گیا، جبکہ ڈمی کوچز کے نام پر ویگنوں کی اصطلاح ختم کرنے کی ہدایت بھی کی گئی۔
حنیف عباسی نے کہا کہ اگر کسی کوچ میں مٹیریل کی کمی ہے تو اسے فوری طور پر پورا کیا جائے، جبکہ ریفربشڈ کوچز کے ریک کے معیار کا معائنہ آپریشنل افسران خود کریں گے۔
وزیر ریلوے نے کارگو سیکٹر میں کامیابی پر اطمینان کا اظہار کرتے ہوئے کہا کہ بزنس کمیونٹی کا اعتماد خوش آئند ہے۔ انہوں نے اعلان کیا کہ تیسری کارگو ٹرین بھی جلد چلائی جائے گی، جس سے تجارتی نقل و حمل میں اضافہ اور ریلوے کی سروس مزید بہتر ہو گی۔
اجلاس کے دوران مختلف شعبوں میں اصلاحات اور نظام کی بہتری کے لیے عملی اقدامات پر بھی غور کیا گیا، جس سے ریلوے کے معیار اور مسافروں کی سہولت میں نمایاں بہتری متوقع ہے۔
