Table of Contents
ملک بھر میں مہنگائی کی نئی لہر کے باعث مرغی اور انڈوں کی قیمتیں ایک بار پھر عوام کی پہنچ سے باہر ہو گئی ہیں۔ سرکاری نرخنامے کے باوجود اوپن مارکیٹ میں من مانی قیمتوں پر فروخت جاری ہے، جس پر شہریوں نے شدید تشویش کا اظہار کیا ہے۔
لاہور میں صورتحال
لاہور میں برائلر مرغی کا سرکاری تھوک ریٹ 349 روپے فی کلو جبکہ پرچون ریٹ 363 روپے فی کلو مقرر کیا گیا ہے۔ سرکاری نرخنامے کے مطابق مرغی کے گوشت کی قیمت 526 روپے فی کلو اور انڈوں کی قیمت 337 روپے فی درجن ہے۔ تاہم اوپن مارکیٹ میں مرغی کا گوشت 550 روپے فی کلو تک فروخت ہو رہا ہے۔
گزشتہ روز لاہور میں سرکاری نرخنامے کے مطابق مرغی کا گوشت 533 روپے فی کلو تھا، جبکہ آج سرکاری قیمت میں 7 روپے کمی کی گئی ہے، لیکن اس کمی کا فائدہ عوام تک منتقل نہیں ہو سکا اور مارکیٹ میں مہنگے داموں فروخت کا سلسلہ جاری ہے۔
فیصل آباد میں نرخ
فیصل آباد میں زندہ برائلر مرغی کا تھوک ریٹ 339 روپے فی کلو اور پرچون ریٹ 353 روپے فی کلو مقرر ہے، جبکہ مرغی کا گوشت 511 روپے فی کلو میں فروخت ہو رہا ہے۔ شہریوں کا کہنا ہے کہ سرکاری نرخنامہ صرف کاغذی کارروائی بن کر رہ گیا ہے۔
ملتان میں قیمتیں
ملتان میں زندہ برائلر مرغی کا تھوک ریٹ 306 روپے فی کلو، پرچون ریٹ 320 روپے فی کلو جبکہ مرغی کے گوشت کا سرکاری ریٹ 464 روپے فی کلو مقرر کیا گیا ہے۔ شہر میں انڈے 338 روپے فی درجن دستیاب ہیں، تاہم کئی علاقوں میں قیمتیں سرکاری نرخ سے زیادہ وصول کی جا رہی ہیں۔
آٹے کی قیمت میں بھی اضافہ
ادھر ملک میں آٹے کی قیمت میں بھی بڑا اضافہ دیکھنے میں آ رہا ہے، جس کے باعث متوسط اور غریب طبقے پر مہنگائی کا دباؤ مزید بڑھ گیا ہے۔ شہریوں کا کہنا ہے کہ روزمرہ اشیائے خورونوش کی قیمتوں میں مسلسل اضافے نے گھریلو بجٹ کو شدید متاثر کیا ہے۔
شہریوں کا مطالبہ
شہریوں نے حکومت اور ضلعی انتظامیہ سے مطالبہ کیا ہے کہ سرکاری نرخنامے پر سختی سے عملدرآمد کروایا جائے اور منافع خوروں کے خلاف مؤثر کارروائی کی جائے تاکہ عوام کو ریلیف مل سکے۔
ماہرین کے مطابق اگر قیمتوں پر کنٹرول نہ کیا گیا تو آنے والے دنوں میں مرغی اور دیگر اشیائے خورونوش مزید مہنگی ہو سکتی ہیں، جس سے مہنگائی کا بحران مزید سنگین ہونے کا خدشہ ہے۔
