ذرائع کے مطابق ایران کے آرمی چیف امیر حاتمی نے امریکا اور اسرائیل کو کسی بھی قسم کی جارحیت سے خبردار کرتے ہوئے کہا ہے کہ دشمن کی معمولی سی غلطی بھی پورے خطے کی سلامتی کو شدید خطرات سے دوچار کرسکتی ہے۔
غیر ملکی خبر ایجنسی کے مطابق امیرحاتمی نے واضح کیا کہ ایران کی مسلح افواج مکمل طور پر ہائی الرٹ ہیں اور کسی بھی صورتحال سے نمٹنے کی بھرپور صلاحیت رکھتی ہیں۔
ایرانی آرمی چیف کا کہنا تھا کہ اگر دشمن نے ایران کے خلاف کوئی مہم جوئی کی تواس کے نتائج صرف ایران تک محدود نہیں رہیں گے بلکہ پورا خطہ عدم استحکام کا شکار ہو سکتا ہے۔
انہوں نے خبردار کیا کہ کسی بھی حملے کی صورت میں صہیونی ریاست کی سلامتی بھی سنگین خطرے میں پڑ جائے گی۔
ایران: بندر عباس میں دھماکا، 8 منزلہ عمارت متاثر
امیرحاتمی نے ایران کے جوہری پروگرام کے حوالے سے بات کرتے ہوئے کہا کہ ایران کی جوہری سائنس اور ٹیکنالوجی کو طاقت کے ذریعے ختم نہیں کیا جا سکتا۔
ان کا کہنا تھا کہ چاہے قوم کے سائنسدان اور فرزند شہید ہی کیوں نہ ہو جائیں، ایرانی جوہری صلاحیت اور سائنسی ترقی کا سفر نہیں رکے گا۔
انہوں نے زور دیا کہ ایران اپنی خودمختاری، سلامتی اور قومی مفادات کے تحفظ کے لیے ہر ممکن اقدام کرے گا۔ ایرانی آرمی چیف کے اس بیان کو خطے میں بڑھتی کشیدگی کے تناظر میں نہایت اہم قرار دیا جا رہا ہے۔
