امریکا میں تاریخ رقم ہو گئی ہے، جہاں ورجینیا ریاست میں پہلی بار مسلم نائب گورنر خاتون غزالہ ہاشمی نے قرآن پاک پر حلف اٹھا کر عہدہ سنبھالا۔ اس موقع پر ریاست کی تاریخ میں پہلی بار خاتون رہنما ایبی گیل اسپین برجر گورنر بنی ہیں، اور اٹارنی جنرل کا عہدہ سیاہ فام جے جونز نے سنبھالا، جو ریاست کی تاریخ میں پہلا موقع ہے۔
غزالہ ہاشمی ورجینیا کی پہلی نائب گورنر خاتون ہیں، اور ان کی حلف برداری کے موقع پر انٹرفیتھ پرئیر بریک فاسٹ کا بھی اہتمام کیا گیا، جس میں امام شریف نے دعا کرائی۔
اس موقع پر سینیٹر صدام ازلان سلیم اور سینیٹر کنعان بھی موجود تھے۔ ایڈمز اسکاؤٹنگ امریکا اور گرلز اسکاؤٹس نے پریڈ میں حصہ لیا، جس کی قیادت رضوان جاکا، احسن اللہ، بیتھنی رشید اور دیگر نے کی۔ رضوان جاکا نے توقع ظاہر کی کہ ریاست میں اتحاد اور تنوع کو فروغ ملے گا۔
ریاستی گورنر کے ایشین امریکن ایڈوائزری بورڈ کے چیئر منصور قریشی نے کہا کہ نہ صرف گورنر اور لیفٹی نینٹ گورنر بلکہ پوری کابینہ ورجینیا میں بلاتفریق عوام، خاص طور پر جنوب ایشیائی کمیونٹی کی خدمت کرے گی۔
یہ تقریب ورجینیا کی تاریخ میں ایک تاریخی لمحہ قرار دی جا رہی ہے، جو نہ صرف ریاست بلکہ پورے امریکا میں تنوع اور بین المذاہب ہم آہنگی کی علامت کے طور پر یاد رکھی جائے گی
